Sayt test rejimida.

TADBIRKORLAR UCHUN

Qashqadaryo viloyati transport boshqarmasi boshlig‘i va uning o‘rinbosari tayinlandi. Bu haqda viloyat hokimligi axborot xizmati xabar bermoqda.

Ulug‘bek Murodillayevich Ernazarov O‘zbekiston Respublikasi Transport vazirligining Qashqadaryo boshqarmasiga boshliq etib tayinlangan.

Ulug‘bek Ernazarov ilgari Qashqadaryo viloyat hokimining investitsiyalar, innovatsiyalar, xususiylashtirilgan korxonalarga ko‘maklashishi, erkin iqtisodiy va kichik sanoat zonalari hamda turizmni rivojlantirish masalalari bo‘yicha o‘rinbosari kotibiyat mudiri lavozimida faoliyat yuritgan.

5 ТА ТУМАНДА 7 МИНГ ГЕКТАР ПИСТА, АЧЧИҚ БОДОМ, ЁНҒОҚ ВА ЧАКАНДА ЭКИЛАДИ

Қарор ва ижро

2019-2020 йиллар давомида Деҳқонобод, Китоб, Қамаши, Қумдарё давлат ўрмон хўжаликлари ҳамда Шаҳрисабз ихтисослаштирилган давлат ўрмон хўжалиги томонидан 7 минг гектар майдонда писта, аччиқ бодом, ёнғоқ ва чаканда плантациялари барпо этилади.

Жумладан, 5 минг гектар майдонда писта экилса, 1000 гектар ерда аччиқ бодом, 500 гектарда ёнғоқ ва 500 гектарда чаканда экилади.

Бу Вазирлар Маҳкамасининг 2019 йил 12 мартдаги "Қашқадарё вилоятида ўрмон хўжалиги соҳасини янада ривожлантириш чора-тадбирлари тўғрисида"ги қарори билан тасдиқланди.

Шунингдек, мазкур қарор билан Қамаши давлат ўрмон хўжалиги таркибида юридик шахс мақомига эга бўлмаган Пистачиликни ривожлантириш илмий-тажриба хўжалиги ҳамда Чироқчи тумани ҳудудида Қумдарё давлат ўрмон хўжалиги ташкил этилди. Эндиликда Қумдарё давлат ўрмон хўжалигига туман ҳудудидаги табиий ўрмонзорлар ҳамда самарасиз фойдаланилаётган ерлардан 28 минг 552 гектар ер майдони ажратиб берилади.

Эслатиб ўтамиз, Президентимиз Шавкат Мирзиёев 2018 йилнинг 13-14 декабрь кунлари вилоятимизга ташрифи чоғида вилоятдаги ўрмон хўжаликлари имкониятларидан самарали фойдаланиб, доривор ва экспортбоп маҳсулотлар етиштириш кўламини ошириш бўйича қатор топшириқ ва кўрсатмалар берган эди.

Жаҳонгир БОЙМУРОДОВ

Manba: qashqadaryogz.uz

Хорижий сармоя

ҚАМАШИДА ҚУРИЛАЖАК ЗАВОД 20 МИЛЛИОН ДОЛЛАРГА ТУШАДИ

Аввал хабар берганимиздек, Озарбайжоннинг етакчи ишлаб чиқарувчиларидан бири - "Матанат А" компанияси вакилларидан иборат делегация Қамаши туманига келганди.

Инвесторлар ҳудуддаги шарт-шароит, ишбилармонлик муҳити, инфратузилма, хом ашё базаси билан яқиндан танишган ва замонавий қурилиш материаллари ишлаб чиқаришга қизиқиш билдирган.

Вилоят ҳокимлиги котибият мудири Улуғбек Эрназаровнинг маълум қилишича, ушбу танишувдан сўнг чет эллик ҳамкорлар вилоятимизда бизнес бошлашга жиддий қарор қилишган. Аҳамиятлиси, Озарбайжон Республикаси иқтисодиёт вазирининг мамлакатимизга ташрифи доирасида "Матанат А" компанияси раҳбарияти ва Қашқадарё вилояти ҳокимлиги ўртасида ҳамкорлик меморандуми имзоланган. Маросимда вилоят ҳокимининг ўринбосари Ойбек Шагазатов қатнашган.

Таъкидланишича, мазкур фирма таклиф этган истиқболли лойиҳа қиймати 20 миллион АҚШ долларига баҳоланган. Унинг доирасида Қамаши туманида гипсокартон, қуруқ қурилиш қоришмаси сингари рақобатбардош маҳсулотлар ишлаб чиқарувчи йирик қувватни ишга тушириш белгиланган. Асосийси, хом ашё муаммо бўлмайди, чунки бу ҳудудда қурилиш материаллари тайёрлашда ишлатиладиган гипснинг салмоқли захираси мавжуд.

М.ШУҲРАТОВ

Manba: qashqadaryogz.uz

Туризм

Меҳмонхона туризм инфратузилмасининг муҳим объекти саналади. Зарур талабга жавоб берувчи, замонавий меҳмонхоналарсиз сайёҳларга сифатли ва қониқарли туристик хизмат тақдим этиб бўлмайди. Аҳамиятлиси, туристларни нафақат диққатга сазовор, тарихий қадамжолар, балки қулай жойлаштириш воситалари ҳам ўзига жалб қилади. Шу маънода муайян ҳудуд ҳақида илк таассурот шаклланишида меҳмонхона фаолияти ҳам сайёҳатчига ўз таъсирини ўтказмай қолмайди.

Улкан туристик салоҳиятга эга вилоятимизда эса ушбу соҳа ривожи жадал кечаяпти, деб бўлмайди. Тўғри, бугунги кунда воҳамизда бир қанча меҳмонхона фаолият кўрсатмоқда. Аммо ҳудудга сайёҳлар оқими тобора кўпайиб бораётган бир пайтда бу қаноатланарли эмас. Мисол учун, 2015 йилда бу турдаги муассасалар сони 26 тани ташкил этган. 2018 йил 1 январь ҳолатига келиб эса мазкур рақам 30 тага етган, 2 йилда ўсиш атиги 4 тага тенг бўлган. Ушбу жойлаштириш воситаларининг асосий қисми 1 ва 3 юлдузли тоифага эга бўлган. 2017 йилда улар хизматидан 50 минг киши фойдаланган, холос. Бунга сабаб эса мавжуд сиғимнинг камлигидир. Айни вақтга келиб 40 га яқин меҳмонхона воҳамиз туристик хизматлар бозорида иштирок этмоқда.

Кўриниб турибдики, вилоятимизда меҳмонхона хўжалигини янада равнақ топтириш, хизмат сифатини тубдан яхшилаш, бу тармоққа инвестиция олиб кириш истагидаги тадбиркорларни эса ҳар томонлама қўллаб-қувватлаш муҳим аҳамият касб этади. Президентимизнинг жорий йил 5 январдаги "Туризм тармоғини жадал ривожлантиришга оид чора-тадбирлар тўғрисида"ги қарори билан шунга кенг имконият яратилмоқда.

Аввало, ушбу ҳужжатга мувофиқ, 3 йил давомида юртимизда, шу жумладан, вилоятимизда янги меҳмонхоналар қуришнинг мақсадли параметрлари тасдиқланди. Яъни 2019-2021 йилларда меҳмонхона бизнесига салмоқли сармоя жалб қилинади. Биргина воҳамизда бу даврда қўшимча 88 та меҳмонхона барпо қилиниши кўзда тутилган. Улар 1637 хонани ўз бағрига олади. Хусусан, жорий йилда 12 та, 2020 йилда 30 та, 2021 йилда эса 46 та замонавий жойлаштириш воситаси қуриб фойдаланишга топширилиши керак. Натижада бу турдаги муассасаларнинг умумий сони 120 тадан ошади.

Эътиборли жиҳати шундаки, аллақачон айни йўналишда бир қанча истиқболли инвестиция лойиҳалари илгари сурилган. Давлатимиз раҳбарининг қарорида ушбу лойиҳалар ташаббускорлари, қиймати ва фойдаланишга топшириш муддати масалаларига аниқлик киритилган.

Тегишли рўйхатдан Қашқадарёдан 7 та лойиҳа жой олган бўлиб, улар асосида ташкил этиладиган меҳмонхоналар жўғрофий жойлашуви бўйича фақат Қарши ва Шаҳрисабз шаҳарлари билан чекланган. Демак, инвесторлар айнан шу ҳудудларни меҳмонхона бизнесини юритиш учун жуда қулай деб билишади. Бевосита ташаббусларга тўхталадиган бўлсак, жорий йилда уларга жами 975 минг АҚШ доллари ҳамда 58 миллиард сўмдан ортиқ маблағ йўналтирилиши лозим. 29 миллиард сўм тадбиркорларнинг ўз сармояси ҳисобидан шаклланса, тижорат банклари ҳам шунча миқдордаги кредит билан молиявий кўмак кўрсатишади. 975 минг АҚШ доллари эса хорижий инвестиция экани диққатга сазовор. Лойиҳалар муваффақиятли рўёбга чиқиши таъминланса, 277 кишининг муқим иш ўрни билан банд этилишига кенг шароит ҳозирланади.

Энг йирик лойиҳа "Назира" хусусий корхонасига тегишлидир. Вилоятимиз марказида замонавий меҳмонхона фаолиятини йўлга қўйиш учун тадбиркор 25 миллиард сўм сарф этади, 30 та янги иш ўрни яратади. Албатта, барча қулайликка эга бўлажак мазкур муассаса жорий йилнинг мартида ишга тушиши режа қилинган. Қарши шаҳрида иш олиб борувчи "Тонг сув қурилиш" МЧЖ ҳам янги меҳмонхона қурилишига 10 миллиард сўм маблағ йўналтиради. Шунинг 7 миллиард сўми инвесторнинг ўз маблағидир. Бошқа бир истиқболли лойиҳа ташаббускори - "Кўҳна турон" масъулияти чекланган жамияти эса Шаҳрисабз шаҳрида фақат меҳмонхона қуриш билан кифояланмайди. Мўъжаз дам олиш зонасини барпо этиш ҳам режага киритилган. Бунинг учун жами 15 миллиард сўм инвестиция ўзлаштирилади. Мазкур икки муҳим инфратузилма объекти фаолият бошлагач, шунинг эвазига 100 нафар киши доимий даромад манбаига эга бўлади.

Икки лойиҳа доирасида эса тўғридан-тўғри хорижий инвестиция жалб қилиниши назарда тутилмоқда. Хусусан, "Дубай Сарбон ЛТД" МЧЖ Қаршида меҳмонхона қурилишига 1 миллиард 500 миллион сўм ўз сармоясидан ташқари 850 минг доллар чет эл капиталини ҳам харжлайди. "Шаҳрисабз эко тур" масъулияти чекланган жамияти эса кўҳна Кешда меҳмонхона зонаси бунёд этишга 125 минг АҚШ доллари ва 1 миллиард сўм инвестиция киритади. Яна бир тадбиркорлик субъекти - "Эверест-С" МЧЖ ҳам сайёҳларни жойлаштириш хизмат тақдим этиш ташаббускори бўлиб чиққан. Қиймати 1 миллиард сўмга баҳоланган ушбу лойиҳа доирасидаги ишлар тез орада якунига етказилиши лозим.

Шунингдек, эндиликда меҳмонхона хизматлари яшаш жойи (прописка), фуқаролик, жисмоний шахсларнинг қариндошлик ва никоҳ муносабатлари, шунингдек, шахсий ҳаёт ҳуқуқини чекловчи бошқа омиллардан қатъи назар кўрсатилиши лозим бўлади.

Президент қарорига кўра, мамлакатимиздаги мавжуд маданият объектлари ва муассасаларида замонавий ахборот технологиялари татбиқ этиш чорасини кўриш ҳам белгиланган. Шу мақсадда тасдиқланган тегишли рўйхатда вилоятимиздан ҳам қатор объектларни кўриш мумкин. Қашқадарё тарихи ва маданияти давлат музейи, Амир Темур номидаги моддий маданият тарихи музейи ва Шаҳрисабз шаҳрида янги ташкил этилган "Мақом музейи" шулар жумласига киради. Мазкур маданият муассасаларида замонавий ахборот технологиялари 2019 йил 1 июлга қадар ўрнатилиши керак.

Хулоса ўрнида айтганда, меҳмонхона хўжалиги юритиш жабҳасида рақобатчиларнинг кўпайиши ўз-ўзидан хизмат сифати ошишига ҳам туртки беради. Меҳмонларни қабул қилиш қуввати ортади, туризм тармоғининг айнан шу соҳадан кўрадиган даромади чўғи ҳам сезиларли кўпаяди.

Маълумот ўрнида эслатиш жоиз, бултур юртимизда илк бор сайёҳларни жойлаштириш воситасининг соддалашган шакли - оилавий меҳмон уйлари фаолиятини юритишга рухсат берилганди. Бундай муассасалар қуввати нисбатан кичик бўлиб, уларга муайян талаблар қўйилган. Ҳозиргача вилоятимизда ўз ишини йўлга қўйган оилавий уй меҳмонхоналар сони 30 дан ошиб кетди.

М.ШУҲРАТОВ

 Manba: qashqadaryogz.uz

Ўзбекистон Республикаси Президенти Шавкат Мирзиёев 2018 йил 28 декабрь куни Олий Мажлисга навбатдаги Мурожаатномани тақдим этди.

Тошкент шаҳридаги Симпозиумлар саройида бўлиб ўтган анжуманда Олий Мажлис Сенати аъзолари ва Қонунчилик палатаси депутатлари, Вазирлар Маҳкамаси, вазирлик ва идоралар раҳбарлари, дипломатик корпус ва халқаро ташкилотлар ваколатхоналари вакиллари, нодавлат ташкилотлар фаоллари иштирок этди. Анжуманни видеоконференция алоқа тизими орқали вилоят, туман ва шаҳарлардаги маҳаллий кенгашлар депутатлари, барча бўғиндаги ижро ҳокимияти ва хўжалик бошқаруви органлари раҳбарлари, шунингдек, мамлакатимизнинг чет эллардаги элчилари кузатиб борди.

Бир йил муқаддам мамлакатимиз тарихида илк марта Ўзбекистон Республикаси Президентининг Олий Мажлисга Мурожаатномаси тақдим этилган эди. Давлат ва жамият ҳаётининг барча соҳаларини тубдан янгилашга қаратилган ушбу дастуриламал даражасидаги нутқ асосида жорий йил учун пухта амалий режалар тузилди, халқимизга муносиб ҳаёт барпо этиш йўлида эзгу ташаббуслар белгиланди.

Давлатимиз раҳбари Мурожаатнома режаларини ҳаётга изчил жорий этишнинг дастури сифатида мамлакатимизда 2018 йилни Фаол тадбиркорлик, инновацион ғоялар ва технологияларни қўллаб-қувватлаш йили, деб эълон қилишни таклиф этди. 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясининг навбатдаги босқичи бўлган 2018 йилда эл-юртимиз фаровонлигини янада юксалтириш йўлида тўла маънода улкан бунёдкорлик, қурилиш-ободонлаштириш ишлари амалга оширилди.

Бу сафарги Мурожаатномада ҳам якунланаётган йилда амалга оширилган ишлар ва келаси йилга мўлжалланган режалар, Ватанимизнинг ички ва ташқи сиёсатидаги асосий тамойиллар баён этилгани билан барчада катта қизиқиш уйғотди.

2018 йилда аҳолининг реал даромадлари 2017 йилга нисбатан 12 фоиз ошди. Солиқларнинг прогноздан ошириб бажарилган қисми ҳисобидан ҳудудларда 5,5 триллион сўм қўшимча маблағ қолдирилгани, бу ўтган йилга нисбатан 6 баробар, 2016 йилга нисбатан эса 32 баробар кўп бўлгани қайд этилди.

Одамларнинг ҳаётдан рози бўлиб яшаши учун қулай шароит яратиш давлатимизнинг доимий эътиборида бўлди. "Обод қишлоқ" ва "Обод маҳалла" дастурлари доирасида 416 та қишлоқ янгича қиёфа касб этди. "Ҳар бир оила - тадбиркор", "Ёшлар - келажагимиз" дастурларини изчил татбиқ этишга киришилди.

Мурожаатномада ижтимоий-иқтисодий ҳаётимизнинг бошқа соҳаларида ҳам муҳим қадамлар қўйилгани қайд этилди. Очиқ иқтисодиёт, соғлом рақобат, ишбилармонлик ва инвестиция муҳитини тубдан яхшилаш, иқтисодиётда давлат иштирокини камайтириш, одамларнинг ҳаёт шароитини яхшилаш бўйича аниқ чора-тадбирлар белгилаб берилди.

Президент Шавкат Мирзиёев таклифига мувофиқ, жорий йилдаги ишларни мантиқий давом эттириш ва юксак босқичга кўтариш мақсадида 2019 йил мамлакатимизда Фаол инвестициялар ва ижтимоий ривожланиш йили деб эълон қилинди.

Бир сўз билан айтганда, кириб келаётган йилнинг бош ҳужжати бўлган Мурожаатномада баён қилинган ҳар бир устувор йўналиш ижроси мамлакатимиз тарихида янги саҳифа очади, халқимизнинг янги, янада юксак марраларни қўлга киритишида пойдевор бўлиб хизмат қилади.

Матназар ЭЛМУРОДОВ,

ЎзА мухбири

Manba: \

OʻZBEKISTON RESPUBLIKASI PREZIDENTINING FARMONI
OʻZBEKISTON RESPUBLIKASIDA 2022 YILDA AHOLINI ROʻYXATGA OLISHNI OʻTKAZISH KONSEPSIYASINI TASDIQLASH TOʻGʻRISIDA